ភ្នំពេញ៖ ជ្រូករស់ចំនួន ៧៣ក្បាល បាននាំចូលពីវៀតណាមតាមច្រករបៀងពញាក្រែក បម្រុងនឹងយកទៅចែកចាយនៅភ្នំពេញ ដោយគ្មានលិខិតអនុញ្ញាតអ្វីទាំងអស់។

ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យស្រាវជ្រាវ និងបង្ក្រាបអំពើរត់ពន្ធតំបន់៦ នៅថ្ងៃទី៣០ ខែមីនា ឆ្នាំ២០២៣ ចុះស្ទាក់ចាប់រថយន្ត ១គ្រឿង ម៉ាក Ssangyong Istana ពណ៌ស ជាប្រភេទរថយន្តដឹកអ្នកដំណើរ ១៥កៅអី ពាក់ស្លាកលេខភ្នំពេញ ២N-៣៥០១ ដឹកសត្វជ្រូករស់ចំនួន ៧៣ក្បាល ដែលទម្ងន់ចន្លោះពី ១០ទៅ ១៨គីឡូក្រាម ដោយនាំចូលពីប្រទេសវៀតណាម មកកាន់ប្រទេសកម្ពុជា តាមច្រករបៀង ស្រុកពញាក្រែក ខេត្តត្បូងឃ្មុំ ដោយគ្មានលិខិតអនុញ្ញាតអ្វីទាំងអស់។

តាមការឆ្លើយបញ្ជាក់ពីម្ចាស់ដឹកជ្រូក ជ្រូកទាំងនេះបម្រុងនឹងយកទៅចែកចាយនៅរាជធានីភ្នំពេញ ខណៈក្រុមការងារអន្តរាគមន៍បទល្មើសបង្ក្រាបបទល្មើសសត្វព្រៃ បានឃាត់នៅភូមិស្ទឹងកាច់ ឃុំកក់ ស្រុកពញាក្រែក ខេត្តត្បូងឃ្មុំ បម្រុងយកទៅចែកចាយនៅរាជធានីភ្នំពេញ។

បច្ចុប្បន្នវត្ថុតាង និងបទល្មើសទាំងនោះ ត្រូវបានក្រុមការងារអន្តរាគមន៍នាំយក ទៅរក្សាទុកនៅទីតាំងចត្តាឡីស័កសត្វ របស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនីតិវិធីច្បាប់៕